.
కడప జిల్లాలోని సిద్దవటం మండలం జ్యోతి గ్రామంలో పెన్నా నది ఒడ్డున ఇసుకలో కప్పబడి ఉన్న 108 శివాలయాల ఆలయాన్ని వెలికితీశారు, ఈ ఆలయం 1213 వ సంవత్సరానికి చెందినది గా గుర్తించారు. 108 శివాలయాలు గల ఈ ఆలయం చాలా ప్రత్యేకమైనది.
ఈ 108 శివాలయాలు గల దేవాలయాన్ని రక్కసి గంగారయదేవ అనే రాజు మరియు అయన అంగరక్షకుడు అయిన జంటిమనాయకుడు 12వ శతాబ్దంలో నిర్మించారని ఆ తరువాత ముస్లిముల పాలనలో ఇసుకతో పూడ్చి వేసారు.
ఈ పవిత్రమైన యాత్ర స్థలాన్ని శ్రీశైలానికి ఉన్న నాలుగు ద్వారములలో జ్యోతి కూడా ఒక ద్వారము. ఆలంపూర్ , త్రిపురాంతకం మరియు ఉమామహేశ్వరం మిగతా మూడు ద్వారాలు.
ప్రసిద్ద చరిత్రకారుడైన మేక్కేంజి ఈ ఆలయాన్ని 1806వ సంవత్సరంలో దర్శించారు. చరిత్ర పరిశోధకుడైన రోబర్ట్ సీవెల్ 1878 వ సంవత్సరంలో ఈ ఆలయాన్ని సందర్శించారు.
పురావస్తుశాఖ ఆద్వర్యంలో జరిపిన తవ్వకాల్లో సుమారు 6 దేవాలయాలు ఇంకా చతుర్ముఖ శివలింగం, సూర్యుని విగ్రహం మరియు నాగ శిలలు బయటపడినాయి, వీటిని దశాబ్దాల క్రితమే చెన్నై మ్యూసియంకు తరలించారు.
శ్రీ సిద్దేశ్వర స్వామి ఆలయం ఉత్తర ముఖంగా ఉంటుంది. ఈ ఆలయములోని శిలా శాసనమును బట్టి కాకతీయ రుద్రమ్మ దేవి వెండి రథము, వజ్రపు కిరీటం ఈ ఆలయమునకు బహూకరించినట్టుగా తెలుస్తోంది.
ప్రస్తుతం ఈ ఆలయం లోపలి భాగం మాత్రం పటిష్టంగా ఉన్నా బయట నుండి మాత్రం ఎప్పుడు కూలుతుందో అన్నట్లుగా అత్యంత దయనీయ స్థితిలో ఎటువంటి అభివృద్ది పనులకు నోచుకోకుండా అధికారుల నిర్లక్ష్యానికి నిలువేత్తు సాక్ష్యంలా నిలిస్తోంది, ఈ ఆలయం చుట్టుపక్కల ఎక్కడా కానీ పురావస్తుశాఖ ఆనవాళ్ళు కనుచూపు మేరలో కూడా కనిపించకపోవడం గమనార్హం... స్థానిక ప్రజలే ఈ ఆలయ ఆలన పాలన చూస్తున్నారు.
ఎంతో మహిమాన్వితమైన ఈ దివ్య క్షేత్రం ఈ దేవాలయాన్ని పునర్నిర్మిస్తే పుణ్యక్షేత్రంగా బాసిల్లుతుంది.
ఇక్కడికి చేరుకోవడానికి కడప నుండి సిద్దవటం చేరుకుంటే అక్కడి నుండి జ్యోతి గ్రామానికి ఆటోలు వెళుతుంటాయి.
No comments:
Post a Comment